බණ්ඩාරවෙල ඇල්ල කිනලන් වත්තේ විද්‍යාලයේ දී කාන්තාවක් විසින් එල්ල කරන ලද ගල් ප්‍රහාරයන්ට ලක් වූ එම විද්‍යාලයේ 1 වන ශේ්‍රණියේ ඉගෙනුම ලැබූ ශිෂ්‍යයෙක් බදුල්ල මහ රෝහලට ඇතුළත් කිරීමෙන් පසු පෙරේදා රාත්‍රියේ මිය ගොස් තිබේ.මරණයට පත් වී ඇත්තේ එම වත්තේම පදිංචිව සිටි එස්. මනෝජ් නැමැති ශිෂ්‍යයෙකි.සිකුරාදා උදේ 7.00 ට පමණ පාසලට ඇතුළු වූ කාන්තාවක් සිසුන් පිටුපස එළවාගෙන ගොස් ඇති අතර ගලකින් හිසට ගසා මෙම ළමයා බිම වැටුණු පසු තවත් ගල්වලින් හිසට හා මුහුණට පහරදී ඇති බවත් ඇය සමග පැමිණි සුනඛයෙකු ද මෙම ළමයා හපා කා ඇති බවත් ‍පොලිස් පරීක්ෂණවලින් අනාවරණය වී තිබේ. මුහුණට හා හිසට බරපතළ තුවාල ලබා ‍ලේ ගලමින් සිටි මෙම සිසුවා වත්තේ කම්කරුවෙකු විසින් ත්‍රිරෝද රථයකින් ගෙන ගොස් දෙමෝදර රෝහලට ඇතුළත් කර ඇති අතර එහිදී හදිසි ප්‍රතිකාර ලබාදීමෙන් පසු බදුල්ල මහ රෝහලට එවා තිබිණ.
සැකකාර කාන්තාව ඇල්ල ‍පොලීසිය විසින් අත්අඩංගුවට ගෙන තිබේ. මෙම පහරදීමට හේතුවූ කරුණු පිළිබඳව නිශ්චිත හේතුවක් මතෛක් අනාවරණය වී නැත.මතෛක් සිදුකරන ලද ‍පොලිස් පරීක්ෂණවලින් හෙළි වී ඇති පරිදි ළමයාට ගල්වලින් පහර දී ඇත්තේ අසල්වැසි ලැයිමක වාසය කරන 23 හැවිරිදි කාන්තාවක විසිනි. ඇය මේ ළමයාගේ මව සමග අමනාපයෙන් පසුවී ඇත. මියගිය ළමයා මව සමග ජීවත් වී ඇති අතර ඔහුගේ පියා පවුලෙන් වෙන්වී ගොස් ඇත්තේ ළමයා කුඩා අවදියේදීය.
සිද්ධිය වූ දින සැකකාර කාන්තාව උදේ 6.30 ට පමණ පාසලට ගොස් මනෝජ් කවුදැයි අනික් ළමුන්ගෙන් විමසා ඇත. පසුව ඔහු සොයාගෙන ඔහුට ගල්වලින් දමා ගසා තිබේ. එවිට මනෝජ් දුවන්නට වී ඇති අතර ඇය එවිට තමා සමග පැමිණි බල්ලා උසි ගන්වා ඇත. බල්ලා දුවගොස් ළමයා බිම පෙරළා ගෙන සපා කන විට එම කාන්තාව යළිත් ගලකින් ළමයාගේ හිසට පහර දී තිබේ.
පසුව අසල්වාසීන් ළමයා රෝහල්ගතකොට ඇත. මෙම ඝාතනයට හේතුව තවමත් අනාවරණය වී නැත.
බණ්ඩාරවෙල ‍පොලිස් අධිකාරි ජගත් චන්ද්‍රකුමාර හා සහකාර ‍පොලිස් අධිකාරි වයි. පී. ආර්. එම්. රිපාඩ් යන මහත්වරුන්ගේ උපදෙස් මත ඇල්ල ‍පොලිස් ස්ථානාධිපති ‍පොලිස් පරීක්ෂක නිහාල් ජයවීර මහතාගේ මෙහෙයවීමෙන් වැඩිදුර පරීක්ෂණ පැවැත්වේ.